«Milli Kitab Mükafatı» ətrafında mübahisə böyüyür

Qəzetimizin ötən sayında Azərbaycanda ilk dəfə olaraq təsis olunan «Milli kitab Mükafatı» müsabiqəsinə gənc yazarların münasibətini dərc etmişdik. Məlum oldu ki, onların əksəriyyəti müsabiqənin obyektivliyinə inanmır. Əsas səbəb kimi isə Münsiflər Heyətində təmsil olunan şəxslərin onlara mənfi münasibəti göstərilib.
Xüsusilə müsabiqənin təşkilində Yazıçılar Birliyinin adının hallanması yazarların heç ürəyincə deyil. Yazarlar deyirlər ki, müsabiqədə Yazıçılar Birliyinin adı varsa burda mütləq söz və ədəbiyyat qanunları pozulacaq və onların baxış tərzi önə keçəcək.  Xatırladaq ki, müasir Azərbaycan ədəbiyyatının inkişafına yönəlmiş mükafatın təsisçisi, “Əli və Nino” nəşriyyat evinin sahibəsi Nigar Köçərlidir. Mükafatın münsiflər heyətində isə Yazıçılar Birliyinin katibi Çingiz Abdullayev, Kinematoqrafçılar İttifaqının sədri Rüstəm İbrahimbəyov, Azərbaycan Jurnalistlər Birliyinin sədri Elçin Şıxlı, kinorejissor Ramiz Fətəliyev, şair Vaqif Səmədoğlu, deputat Rəbiyyət Aslanova, Yazıçılar Birliyinin katibi Rəşad Məcid, “Xəzər” Universitetinin rektoru Hamlet İsaxanlı, teleaparıcı Nərgiz Cəlilova, prodüser Balakişi Qasımov və “Muğam” radionun rəhbəri Elnur Baimov təmsil olunub.  Maraqlıdır, adı çəkilən şəxslər yazarların iradlarını necə dəyərləndirir?

 Rəşad Məcid: «Əsərləri münsiflər heyəti yox, onlardan əvvəl ekspertlər şurası araşdıracaq »

Yazıçılar Birliyinin katibi və 525-ci qəzetin baş redaktoru  Rəşad Məcid yazarların səsləndirdiyi iradlarla razılaşmadı. R. Məcid bildirdi ki, müsabiqənin təsisçisi “Əli və Nino” nəşriyyat evinin sahibəsi Nigar Köçərlidir və həmin xanım çox hörmətə laiq iş görüb ki, paytaxda kitab mağazaları yaradıb: “Düzdür, bəziləri deyirlər ki, bu kitab mağazalarında daha çox rusdilli kitablar var. Ancaq yenə də belə mağazaların yaradılmasını dəstəkləmək lazmıdır. Elə bu irada görə də Nigar xanım məhz Azərbaycanda kitab işinin təşkilinə və inkişafına nail olmaq üçün «Milli Kitab Mükafatı» ideyasını irəli sürüb”. Münsiflər heyyətinin tərkibinə  gəlincə, R. Məcid əlavə etdi ki, Nigar xanım daha nüfuzlu şəxsləri münsif kimi görmək istəyib: “Ancaq iş münsiflər heyyəti ilə yekunlaşmır. Münsiflərdən öncə orda bir ekspertlər şurası da olacaq ki, həmin şuraı göndərilən əsərlərə baxacaq və onların içindən ən yaxşılarını seçib münsiflər heyyətinə təqdim edəcək. Yəni münsiflərin müsabiqədə rolu sonda ekspertlər şurasının seçdiyi 10 əsəri qiymətləndirmək olacaq. Hər halda bu mükafatı təssis edən özəl bir strukturdur və hesab edirəm ki, indidən nəyəsə narazılıq etməyin yeri deyil”. R. Məcid onu da əlavə etdi ki, müsabiqənin nəticəsinin ürəkaçan olacağını düşünür”.

Elçin Şıxlı: «Gənc yazarlar məni də rusdilli sayırlarsa, onların heç nədən xəbərləri yoxdur»

Müsabiqənin digər bir münfisi Azərbaycan Jurnalistlər Birliyinin sədri Elçin Şıxlı isə “Bizim Yol” açıqlaqmasında bildirdi ki, əgər yazarlar münsif heyyətindən narazıdırsa onda özləri müsabiqə təşkil edib münsif heyyəti yaratsınlar: “Bu mükafat gənc yazarlar üçün təyin olunmayıb. Sadəcə, son 10 il ərzində əsər yaradan şəxslər müsabiqəyə qatıla bilər. Digər bir məsələ isə münsif hansı dilli olursa olsun əgər sənin ədəbiyytadan başın çıxırsa, deməli qiymətini alacaqsan. Ədəbiyyatdan başın çıxmırsa münsifi bəhanə gətirməyin yeri yoxdur. Çünki münsifin qiymət verə bilməsi üçün onun rusdilli olub olmaması lazım deyil. Əgər məni rusdilli sayırlarsa, onda görünür həmin şəxslərin heç nədən xəbərləri yoxdur”.
E. Şıxlı deyir ki, yazarların Yazıçılar Birliyini gündəmə gətirməsi onu deməyə əsas verir ki, müsabiqə haqda düzgün məlumat almayıblar: “Həmin müsabiqənin təşəbbüskarı Nigar Köçərlidir və Yazıçılar İttifaqının bura heç bir aidiyyatı yoxdur. Yazıçılar İttifaqı sadəcə olaraq müsabiqəyə dəstək verib. Bu mənada, həmin xanım Yazıçılar Birliyini dəvət edib və müxtəlif təşkilatlar isə müsabiqəyə sponsorluq edirlər. Söhbət məndən gedirsə, mənim də Yazıçılar Birliyinə o qədər də aidiyyatım yoxdur.  Müsabiqədən narazı olan adamlar informasiyanı dəqiq oxusunlar. Hərəkət olmamış narazılığa heç bir gərək yoxdur. Əgər müsabiqənin obyektiv keçiriləcəyinə inanmırlarsa, onda ümumiyyətlə iştirak etməsinlər və heç bir problem də olmasın».
 
Vüsalə ABBASOVA