Fərhad Əhmədov Avropanın ən nüfuzlu qurumuna üz seçilib

Rusiyada yaşayan azərbaycanlı iş adamı Fərhad Əhmədov Avropa İqtisadi Ticarət, Kommersiya və Sənaye Palatasının üzvü, sonra isə senatoru seçilib. Bu barədə qəzetimizə verilən məlumata görə, qərar  iyulun 15-də verilib: “Sənaye Palatası Avropa İqtisadi Maraqlar Qrupunun (EEİG) formatı əsasında təsis edilən nəhəng və nüfuzlu beynəlxalq qeyri-hökumət təşkilatıdır.

Qurum Avropa İqtisadi Birliyi Şurasının 25 iyul, 1985-ci il tarixli qərarı ilə təsis olunub. Brüsseldəki Kommersiya Məhkəməsi tərəfindən rəsmi qeydiyyata alınıb və Avropa məkanında hüquqi şəxs kimi çıxış edir. EEİG-in yaradılmasının əsas təşəbbüskarı Avropa iqtisadiyyatının özəl sektorudur. Bu qurumun məqsədi Avropa Birliyi ölkələri hökumətlərinin siyasi, iqtisadi, sosial və mədəni-humanitar məqsəd və vəzifələrini dəstəkləməkdir. Təşkilatın adı Avropa Birliyinin ticarət markası kimi müdafiə olunur. Avropa hökumətinin rəsmi məsləhətçisi olan EEİG-in missiyası həm Avropa Birliyi ölkələrinin daxili bazarında, həm də Avropa Birliyi ölkələri ilə digər ölkələrin işgüzar dairələrinin münasibətlərində vasitəçi olmaqdır”.
Qeyd edək ki, Rusiyanın ən nüfuzlu varlı adamlarından olan F.Əhmədov 1955-ci ildə Göyçayda doğulub. 15 yaşında Rusiyaya gedən soydaşımız orada biznes və siyasi fəaliyyət sahəsində parlaq karyera əldə edib. Rusiyada Skryabin adına Veterinarlıq Akademiyasını və Qubkin adına Neft İnstitutunun aspiranturasını bitirib, bir müddət dövlət idarələrində işləyib. 1985-ci ildə özəl bizneslə məşğul olmağa başlayıb. Az sonra Böyük Britaniyaya mühacirət edib və Londonda nüfuzlu Yüksək İqtisadiyyat Məktəbinə daxil olub. Elitar iqtisadi təhsil alandan sonra neft biznesinə keçib. Londonda “Tansley Trading Ltd.” adlı şirkət təsis edib. Bu şirkət “Qazprom”un tərəfdaşlarından olub. 1989-cu ildə ABƏŞ-in yaradılmasının əsas ideoloqlarından biri kimi çıxış edib, “Amoco Eurasiya” və “McDermott” neft şirkətlərini bu layihəyə cəlb edib.
Rusiyaya qayıdan soydaşımız 1993-cü ildə özəl neft şirkəti - “Nortgaz” QSC-ni qurub. Şirkət Rusiyanın Yamal-Nen Muxtar Vilayətindəki iri neft-qaz yataqlarından olan Şimali Urenqoy yatağının işlənməsində operator olub. F.Əhmədov Rusiyada və dünyada senator olan ilk azərbaycanlıdır. Hazırda “Nortgaz” şirkətinə rəhbərlik edən F.Əhmədovun sərvəti 1 milyard dollardan yuxarı hesablanır. Ümumrusiya Azərbaycanlıları Konqresinin vitse-prezidenti, Azərbaycanda Göyçay nar emalı zavodunun əsasında yaradılan “Aznar” şirkətinin sahibidir.

Natiq CAVADLI